杜曹引發連鎖效應　哥迪奧拿可專心留效曼城

杜曹將會接掌英格蘭國家隊帥印，意味原本另一位大熱人選哥迪奧拿無緣擔任「三獅兵團」領隊，好大機會同曼城續約，延續「藍月亮王朝」，球會管理層應該可以暫時鬆一口氣。

英格蘭之前遲遲未確定新帥人選，只由卡斯利擔任看守領隊，曾經被指等緊哥迪奧拿明夏同曼城約滿之後，聘請佢接手領軍。呢位西班牙名帥近日亦多次被傳媒問到是否會執教英格蘭，佢並冇直接否認，去留一度惹起猜測。

不過，隨住英格蘭足總請杜曹領軍，哥迪奧拿冇咗一大出路，同曼城續約成為佢最佳選擇。此外，杜曹曾經係曼聯斟介目標，希望請佢取代坦哈格，但紅魔鬼現時如果要換帥，只能另覓人選。