曼聯轉玩「拜仁化」？再睇中3大球星

曼聯自荷蘭領隊坦哈格上任後，組軍明顯「阿積士化」，可惜成績未見起色。最近佢哋似乎想「升呢」，繼夏天簽入馬沙拉奧同馬菲斯迪歷特2位拜仁慕尼黑球員後，據報再睇中呢支德甲班霸多3名球星，改玩「拜仁化」！

德國《天空體育》記者Florian Plettenberg爆料，曼聯正考察利萊辛尼、哥列斯卡喺拜仁嘅情況。兩位德國國腳今季喺高柏尼麾下，齊齊被打入冷宮；中場哥列斯卡今季聯賽只係後備上陣踢過1分鐘，翼鋒利萊辛尼「好少少」，2次後備上陣踢咗32分鐘。無可否認兩個都係有實力嘅球員，曼聯考慮人棄我取，將佢哋收歸旗下。

除此之外，拜仁左閘艾方素戴維斯盛傳亦係曼聯目標之一，左閘一直係「紅魔鬼」最大弱點，呢位23歲加拿大國腳就係曼聯最好嘅「解藥」。艾方素戴維斯雖然係拜仁必然正選，但佢張合約去到明年夏天完結，曼聯將出手力邀佢加盟，不過將面對皇家馬德里同其他英超球會強烈競爭。