曼联转玩“拜仁化”？再睇中3大球星

曼联自荷兰领队坦哈格上任后，组军明显“阿积士化”，可惜成绩未见起色。最近佢哋似乎想“升呢”，继夏天签入马沙拉奥同马菲斯迪历特2位拜仁慕尼黑球员后，据报再睇中呢支德甲班霸多3名球星，改玩“拜仁化”！

德国《天空体育》记者Florian Plettenberg爆料，曼联正考察利莱辛尼、哥列斯卡喺拜仁嘅情况。两位德国国脚今季喺高柏尼麾下，齐齐被打入冷宫；中场哥列斯卡今季联赛只系后备上阵踢过1分钟，翼锋利莱辛尼“好少少”，2次后备上阵踢咗32分钟。无可否认两个都系有实力嘅球员，曼联考虑人弃我取，将佢哋收归旗下。

除此之外，拜仁左闸艾方素戴维斯盛传亦系曼联目标之一，左闸一直系“红魔鬼”最大弱点，呢位23岁加拿大国脚就系曼联最好嘅“解药”。艾方素戴维斯虽然系拜仁必然正选，但佢张合约去到明年夏天完结，曼联将出手力邀佢加盟，不过将面对皇家马德里同其他英超球会强烈竞争。