費Sir「最後建議」　欽點意大利名帥接替坦哈格

曼聯領隊坦哈格備受下台壓力，盛傳如果紅魔鬼未來1個月表現再冇改善，呢位荷蘭名帥就會被炒，英國《每日郵報》指曼聯傳奇領隊費格遜建議，聘請意大利名帥阿里基接手領軍。

曼聯今夏曾計劃請前拜仁慕尼黑教練杜曹領軍，但被對方拒絕，現時已成為英格蘭新主帥，其他目標人物施丹、修夫基亦無意成「魔」。另外，紅魔鬼睇中國際米蘭教練施蒙尼恩沙基，但「細恩」仲有2年位約在身，估計短期內唔會離隊。

因此，費格遜建議曼聯可以招攬阿里基，因為呢位前祖雲達斯教練現時冇工作在身，可以立即接手，加上佢以往教波成績輝煌，曾經率領AC米蘭及祖雲達斯奪得意甲冠軍，相信有力協助曼聯重回正軌。

不過，費格遜日前被曼聯「炒魷」，今季結束之後，冇得再做球會全球大使職務，新股東拉特克利夫會唔會接受佢今次「最後建議」，實屬疑問。