曼聯新兵又出事　烏加迪「為國捐軀」受傷

曼聯今季新加盟球員連番出事，繼右後衞馬沙拉奧因為心悸問題進行手術治療，需要抖數星期之後，另1位新兵文路爾烏加迪周三(16日)為烏拉圭踢世界盃外圍賽對厄瓜多爾，整傷肌肉退下火線，可能缺陣周六(19日)晚英超主場對賓福特。

烏拉圭該仗主場同厄瓜多爾打和0比0，文路爾烏加迪踢到82分鐘傷出，據悉佢當時感到右腳大腿痛楚，疑似拉傷肌肉，將接受進一步檢查以確定傷勢。

呢位23歲中場8月底以4,200萬鎊(約4.2億港元)由巴黎聖日耳門加盟曼聯以來，各項賽事僅上陣5次，佢對上1次為紅魔鬼上陣係9月底英超0比3不敵熱刺，近2場比賽對波圖及阿士東維拉，都全場坐冷板。

預料曼聯周六(19日)晚英超主場對賓福特，將繼續由般奴費南迪斯、明奈及基斯甸艾歷臣擔任正選中場。