【未亡人系列】柏度有心有力　将续约踢到39岁

当今球坛“长青树”除咗C朗、美斯之外，仲有柏度洛迪古斯，呢位37岁西班牙前锋比2位球王更犀利，现时仲踢紧欧洲4大联赛，并将获拉素续约至2026年6月，起码踢到39岁。

恩尼斯达早前挂靴后，昔日“巴塞梦幻二队”只剩下柏度洛迪古斯仲踢紧，并且表现大勇，今季开锣后，虽然仅为拉素上阵200分钟，但已入2球及2次助攻，包括上场意甲对安玻里，后备上阵射入反胜1球，当选该场最佳球员，状态“返老还童”，因为佢上季上阵45场仅入3球。

根据《罗马体育报》爆料，拉素管理层希望继续留住柏度洛迪古斯，向佢开出新合约，相信短期内会正式落实。柏度洛迪古斯出身于巴塞隆拿青年军，为巴塞一队上阵321场入99球，赢尽西甲、西班牙杯、欧联、世冠杯等多项锦标，转投车路士后，捧过英超、英足杯、欧霸杯冠军，亦系西班牙夺得2010年世界杯及2012年欧国杯冠军成员。

此外，柏度洛迪古斯属于少数效力过意甲2支首都宿敌嘅球员，佢2021年由罗马转投拉素，为拉素上阵137场入22球。