車路士又入錯貨？17歲新星係「爛蒲精」

車路士上年6月「預訂」厄瓜多爾天才前鋒柏斯，呢位17歲新星將於明年夏天年滿18歲後，正式加盟車仔。不過，根據英國《太陽報》爆料，柏斯原來係「爛蒲精」，經常去夜店玩，令人擔心佢會自毀前途。

據悉今年3月，厄瓜多爾國家隊去美國踢熱身賽，柏斯同隊友一齊幫襯脫衣舞夜店，佢當時只有16歲，違反美國禁止21歲以下人士進入脫衣舞夜店嘅法律，厄瓜多爾足總曾經警告柏斯如果再犯，就會踢佢出國家隊。

呢位天才前鋒似乎仲未吸取教訓，早前國際賽前夕，又被影到現身夜店，厄瓜多爾主帥比卡施斯隻眼開、隻眼閉，指柏斯踢國家隊表現出色，如果出去玩要適可而止，可見柏斯地位「超然」，難怪咁放肆。

不過，車路士球星如雲，紀律嚴明，柏斯明年上「車」後，如果再唔收歛一下，恐怕會遭受處罰。