富安健洋復出又再傷　將抖1個月

阿仙奴後衞富安健洋近年經常受傷，今季開鑼之後，直至上輪英超對修咸頓，先至復出，但係又再次受傷，估計需要休息1個月。

富安健洋上仗等到84分鐘後備上陣，但好景不常，其後證實佢觸傷膝部舊患，根據英國《每日電訊報》爆料，呢位25歲日本國腳將再缺陣1個月。

富安健洋上季因為肌肉受傷，缺陣13場比賽，佢加盟阿仙奴以來，遭遇6次不同傷病，累積休息超過357日，屬於同期之中，缺陣最長時間嘅阿仙奴球員，所以傳出兵工廠可能明年1月出售富安健洋。