哥帥前途未明　曼城「Plan B」請施丹執教

曼城領隊哥迪奧拿雖然無緣執教英格蘭國家隊，但是否同「藍月亮」續約，仍然未有定案，盛傳曼城已經有「Plan B」，一旦哥帥明夏離隊，就會聘請法國名宿施丹接手領軍。

哥迪奧拿將於明夏約滿，加上同佢合作多年嘅總監碧格列斯坦亦將於今季結束後離隊，哥帥至今仍未表態是否續約，令人懷疑佢打算另謀高就。

曼城喺哥迪奧拿執教之下，捧過6次英超、2次英足盃、4次英聯盃、1次歐聯及1次世冠盃等多項錦標，要搵1位具級數名帥接替哥帥，並非易事。

施丹屬極少數合適人選，畢竟佢曾經以主帥身份率領皇馬奪得2次西甲、3次歐聯、2次世冠盃等錦標，最重要係施丹現時冇教職在身，邀請佢加盟，比向其他豪門挖角容易。

另一支曼市球隊曼聯都有意聘請施丹，但佢似乎嫌棄紅魔鬼積弱多年，唔想接手爛攤子，反觀曼城正處於高峰，施丹應該願意執教，延續自己冠軍級金漆招牌。