車路士註冊新會徽　自稱「倫敦正宗」

英超勁旅車路士喺新老闆入主後，球隊內外都改頭換面，唔單止陣容幾乎換晒新球員，最近更註冊埋新會徽，準備喺明年120周年會慶推出，而且仲自稱為「倫敦正宗球會」，當阿仙奴、熱刺等倫敦對手冇到！

英國《每日郵報》報道，車路士委託Uncommon Creative Studio設計嘅新會徽已經順利註冊，新標誌係傳統嘅藍色獅子，腳下有「LDN」3個英文字，設計公司宣傳話意思係：「新標誌要顯示車路士係倫敦正宗球會」，擺明唔放另外6支依家踢緊英超嘅球會(阿仙奴、熱刺、韋斯咸、水晶宮、賓福特同富咸)在眼內。

不過，車路士表明新會徽並唔會取代現有會徽，至少喺未諮詢過球迷意見之前唔會改變，而新會徽會喺120周年會慶嘅商品上面使用，「吸金」用途似乎更大。