巴塞被「假羅拔經理人」呃　奉獻100萬歐元

依家電騙陷阱猖獗，唔單止小市民隨時中招，連堂堂西甲班霸巴塞隆拿都「瀨嘢」！據西班牙媒體《Cadena SER》報道，巴塞喺2022年夏天收購羅拔利雲度夫斯基嗰陣，被一名冒充羅拔仔經理人嘅騙徒欺詐，乖乖奉上100萬歐元佣金，好在銀行發現有問題及時終止，先令巴塞冇受到損失。

巴塞2年前用4,500萬歐元向拜仁慕尼黑收購羅拔仔，當時佢哋收到一個自稱薩哈維(羅拔仔經理人)嘅人寄出電郵，要求球會將100萬歐元佣金轉去一個塞浦路斯銀行戶口，戶口持有人報稱係個律師。估唔到巴塞真係聽話過數，不過銀行認為呢筆交易「有可疑」而叫停。

騙徒之後仲未死心，去信威脅會取消羅拔仔轉會，甚至向歐洲足協提出起訴，同時亦致電塞浦路斯銀行要求批准轉帳，不過銀行「企硬」，幫巴塞逃過一劫。據報巴塞本來冇打算報警，但之後騙徒再寄兩封電郵索取金錢，巴塞終向警方舉報。