麥巴比復操　獲皇馬頒每月最佳球員獎

近日被指控強姦嘅法國前鋒基利安麥巴比，周四(17日)喺皇家馬德里復操，如無意外可以喺周日(20日)凌晨作客切爾達嘅聯賽候命。雖然捲入強姦醜聞，但麥巴比仍獲皇馬力撐，更獲頒發9月份最佳球員獎，對佢嘅貢獻表示肯定。

麥巴比早前報稱受傷，缺席法國國家隊最近歐國聯賽事，上周佢就趁國際賽空檔飛去瑞典度假，結果發生被指控強姦事件。否認指控嘅麥巴比似乎未受事件困擾，周四操練後更喺社交網放上訓練入波片段，留言「繼續練習，馬德里加油！」

另外，皇馬日前亦向麥巴比頒發9月份最佳球員獎，呢位前鋒上月為皇馬貢獻6個入波同1次助攻，顯示佢適應後開始爆發。麥巴比領獎後表示：「好開心拎到呢個獎，最重要係今個月要繼續贏波，希望下個月我都可以冧莊！」