柏基達「黃牌門」洩密　發聲明要足總徹查

韋斯咸中場盧卡斯柏基達，今年5月被英格蘭足總起訴違反賭博條例，並且「局部操控比賽」，故意拎黃牌後喺博彩獲益。有關案件仍然喺起訴程序當中，不過唔少調查細節都被媒體公開，呢位巴西球星周四(17日)發聲明，要求英足總徹查洩密情況。

柏基達發聲明表示：「巴西同英格蘭不斷有啲唔準確同誤道嘅報道出現，令我非常憤怒，當中有部份資料完全失實，旨在抹黑我。我關心嘅係，雖然啲資料係假，但來源報稱係接近案件嘅人士，足總嘅審訊理應係機密，但不斷有失實資訊流出，令我有失去得到公平審訊嘅危險，所以我委託律師，要求足總就洩密事件作出全面調查。」

柏基達被指喺2022年到2023年間，喺4場英超入面故意拎黃牌，上個月有巴西媒體爆料，指柏基達嘅叔叔同堂兄弟，喺今年初「過數」畀前貝迪斯翼鋒路爾斯軒歷基，懷疑透過呢位巴西球員喺西甲拎黃牌獲利。