英超試行新例　門將拖時間要「罰角球」

英超今季嚴打拖延時間行為，英國職業裁判員公司(PGMOL)主席韋比日前透露，佢哋依家正喺「英超2」比賽試行新例，如果門將用手持球超過6秒，對手將會得到一次角球機會。

前英超判官韋比表示：「喺英超2入面，球證試緊禁止門將用手持球多過6秒嘅新例，如果龍門拎住個波8秒都唔放手，對手會有一個角球。喺3秒之後，球證就會開始倒數，罰角球可以避免禁區內判間接自由球嘅混亂場面。」

曼聯名宿加利尼維利對新例表示支持：「我鍾意呢條例，英超要杜絕拖延時間，迪格蘭賴斯季初踢個波被逐，因為佢拖延咗千份之一秒，條例係咁我明白。但比賽入面最長嘅拖延就係龍門，有時佢哋會拎住個波13、14秒，每次都浪費6、7秒時間，真係睇到人都癲！」