曼聯領隊考牌戰？法蘭克戥坦哈格可憐

曼聯周六(19日)會喺英超迎戰賓福特，備受壓力嘅領隊坦哈格不容有失。英國《曼徹斯特晚報》爆料，賓福特領隊法蘭克係曼聯高層心儀目標，呢場可能成為該丹麥主帥嘅「考牌戰」，不過法蘭克賽前就為坦哈格申冤，稱外界對佢嘅批評太過火。

已執教賓福特6年嘅法蘭克表示：「坦哈格受到嘅壓力係難以置信，作為一個領隊我好明白，佢受到嘅批評太過火。坦哈格絕對係好領隊，2年贏2個冠軍，但我都知道，當球隊贏波你就係神奇領隊，輸波就係垃圾教練，永遠都冇中間。」

據《曼徹斯特晚報》消息，如果坦哈格未能改善成績被炒，法蘭克會係熱門繼任人之一，佢合約內有300萬鎊嘅解約條款，曼聯絕對有能力負擔。賓福特依家多過曼聯2分排11位，而且季初已經作客對過曼城、利物浦同熱刺，有呢個成績絕對唔差。