天亡坦哈格？明奈受傷缺陣7場

曼聯中場新星明奈國際賽期間因傷退出英格蘭國家隊，英超本周重開，但明奈仲未出得，曼聯證實該19歲小將將養傷一個月，將缺陣7場比賽，坦哈格嚟緊連場生死戰頓失倚靠。

英國傳媒報道，明奈於上場對阿士東維拉腿筋受傷，將會缺陣未來幾場硬仗，包括周六對賓福特，同埋下周中歐霸盃作客費倫巴治，到時坦哈格將硬撼由「寸王」領軍嘅費倫巴治，新舊曼聯主帥正面交鋒，此戰亦被視為坦哈格帥位一大關口。

曼聯本來仲有新加盟嘅文路爾烏加迪，但該位烏拉圭中場在世盃外對厄瓜多爾期間大腿受傷換出，返到曼聯只能參加部分輕量操練，如果連佢都傷埋，曼聯嚟緊幾場大戰就得番中場老將孖寶，基斯甸艾歷臣拍住卡斯米路，情況都幾惡劣。

再睇曼聯嚟緊一個月比賽，對手有賓福特、費倫巴治、韋斯咸、李斯特城、車路士、PAOK同再對李斯特城。