安歷基獲PSG續約2年　畀佢話晒事

巴黎聖日耳門同主帥安歷基明年夏天約滿，據報雙方將會續約2年至2027，年薪為稅前1,200萬歐元(約1億港元)，安歷基仲有好大話事權，幾乎係話晒事。

PSG早在今年初就考慮安歷基去留問題，會方認為，安歷基係球隊理想主帥，上季有段時間安歷基同基利安麥巴比因上陣時間鬧不和，球會都企喺安歷基一方，雙方續約自然水到渠成。

作為歐洲豪門，安歷基薪酬當然優厚，但最重要係放權畀安歷基發揮，容許佢喺組軍買人同陣容選擇上都有好大話事權，相等於想點就點，不過有咁大權限自然有要求，會方最大目標係歐聯，等待安歷基達成。

人工高福利好，仲話晒事，PSG嘅安排可以話係所有教練嘅dream job，安歷基當然滿意，雖然佢一直希望再執教巴塞隆拿同西班牙國家隊，但嗰兩隊波依家都有好教練領軍，因此安歷基亦可以專心為PSG工作。