不滿做後備　尼干古考慮離開車路士

車路士今季成績好轉，但人滿之患始終係個問題，前鋒尼干古上季加盟後傷多過踢，今季好番又長做後備，據報尼干古對於冇得做正選好唔甘心，考慮離隊。

車路士在新帥馬利斯卡領軍下，中前場人腳逐漸成形，高爾彭馬係鐵膽，拍住尼高拉斯積遜、馬度基、查頓辛祖進攻多變，尼干古成為邊緣人，只能長居後備，至今英超僅1次正選，喺重要性較次嘅盃賽擔正，佢對此安排好不滿。

尼干古去年夏天以6,000萬歐元身價由RB萊比錫加盟車路士，原本備受矚目，可惜佢一嚟就傷，到佢好番已經收咧，車路士連領隊都換埋，今季雖然康復，但佢冇乜機會發揮，至今上陣11場入7球，數據甚佳，但只能在盃賽擔正，令佢好冇癮。

據報假如今季餘下時間情況冇改善，明年夏天佢就會離隊，到時可能重投母會巴黎聖日耳門懷抱。