教唔掂沙特　文仙尼即將被炒

沙特阿拉伯上場世界盃外圍賽亞洲區第3圈C組主場同巴林打和0比0後，4戰僅1勝，根據沙特傳媒報道，該國足總已經準備解僱領隊文仙尼，希望挽救球隊出線希望。

沙特阿拉伯喺C組4場比賽之中，僅險勝中國2比1，近2場分別0比2不敵日本，以及打和巴林0比0，只有5分在手，想取得前2位直接出線資格，形勢唔樂觀，所以沙特足總計劃短期內換帥，以應付下月世盃外對澳洲及印尼，據悉已有多位新帥候選人。

現年59歲嘅文仙尼曾率領意大利奪得2021年歐國盃冠軍，但卻未能打入上屆世界盃決賽周，佢上年8月突然辭去意軍主帥職位，跳槽擔任沙特阿拉伯領隊，獲得2,500萬歐元(約2.1億港元)年薪。

不過，沙特阿拉伯喺文仙尼執教下表現令人失望，今年1月亞洲盃16強出局，更加發生同球員不和事件，加上現時世盃外成績欠佳，文仙尼下台壓力愈來愈大。