死心不息　坦哈格要簽迪莊博翻身

根據英國媒體《TEAMtalk》爆料，如果曼聯周六(19日)晚英超主場未能擊敗賓福特，就會解僱領隊坦哈格，但呢位荷蘭名帥唔認命，揚言自己帥位穩陣，並計劃明年1月轉會市場重開之後，再次出手收購巴塞隆拿中場法蘭基迪莊。

坦哈格出席對賓福特嘅賽前記者會，怒斥傳媒作故仔指佢會被炒：「噪音就係來自你哋部分人，創造故事及傳聞，帶來謊言，我係球會一員，國際賽之前已經同記者講過，球會內部一切平靜，可能記者們唔相信我。」

西班牙《每日體育報》指坦哈格再次向會方提出收購法蘭基迪莊，認為只要獲得呢位27歲荷蘭國腳加盟，球隊就可以重回正軌。兩人曾於阿積士合作，坦哈格2年前成為曼聯主帥後，一直想簽入呢位昔日愛將，巴塞亦同意出售佢，兩間球會甚至已達成以6,500萬歐元(約5.5億港元)轉會費成交，但法蘭基迪莊無意離隊，令交易未能成事，至於呢位中場今次會唔會改變主意，仍然係未知之數。