孫興民復出有「士哥」　熱刺大炒韋斯咸

周六晚(19日)英超早場「倫敦打吡」，熱刺再顯「神經刀」本色，在先失波情況下，主場4比1反勝韋斯咸。熱刺隊長孫興民傷愈復出不但有「士哥」，仲搞到對方擺烏龍，有兩個入波關佢事，表現醒神，較為可惜嘅係，比蘭莊臣冇波入，連續7場入波走勢斷纜。

孫興民復出，熱刺領隊普斯迪高路今場實行擺大個頭，出晒比蘭莊臣、古路施夫斯基、蘇蘭基同占士麥迪臣等攻擊球員，攻力十足，不過前邊掛住攻後防就有疏漏，被客軍古達斯18分鐘先開紀錄。

熱刺落後之下攻得更急，36分鐘憑古路施夫斯基勁射中晒兩條柱入網扳平，1比1完半場。下半場熱刺繼續瘋狂搶攻，52分鐘比蘇馬近門撞射得手反超前2比1。

熱刺之後兩球都關孫興民事，55分鐘呢位南韓前鋒右路近射，被對方門將艾路拿救到後彈中後衞圖迪保隻腳，再撞到艾路拿入網成3比1，5分鐘後「孫仔」左路一輪插花再勁射成4比1，尾段韋斯咸輸到火滾，古達斯先後出掌推雲迪雲、柏比沙亞同李察利臣，被罰紅牌出場，熱刺最後大勝4比1完場。