關照好兄弟　連格推薦普巴踢韓職

連格轉戰韓職就快踢完首個球季，全季上陣21場入5球1助攻，表現過得去之餘，佢仲想關照老友，推薦保羅普巴過嚟韓職搵食，兩兄弟拍住上。

連格同普巴係曼聯青訓同期隊友，2011年一齊贏過青年足總盃冠軍，跟住上埋一隊，佢哋亦係夜蒲嘅鐵腳，轉眼間足球生涯過咗大半，兩人已經31歲，各自有唔同經歷。

連格知道普巴最近上訴成功，明年將會提前解除停賽禁令，可以復出，不過祖雲達斯打算同佢解約，普巴回復自由身，因此連格表示，如果要推薦一位球員加盟韓職，佢會揀普巴。

連格表示：「我6、7歲加入曼聯，一開始就知道效力曼聯一定要有爭勝心，要有渴望贏冠軍嘅心態，到依家我都未變過，我希望能夠幫FC首爾奪取聯賽冠軍。」