中堅血流披面　曼聯激情反勝賓福特

周六晚（19日）曼聯主場迎戰賓福特，結果「紅魔鬼」谷底反彈，半場落後1球下激情反勝賓福特2比1，5場不勝後總算重回正軌，聯賽8戰得11分，獲高層留用嘅領隊坦哈格又過一關。

明奈受傷缺陣，文路爾烏加迪狀態不足，曼聯中場焗用卡斯米路拍基斯甸艾歷臣兩位老將，上半場入波黃金機會就係畀艾歷臣嘥咗；近幾場開賽初段玩「偷襲」嘅賓福特，今場改打保守戰術，初段頂住曼聯猛攻。

曼聯攻極唔入，仲有中堅馬菲斯迪歷特勇戰頭部爆缸，搞到血流披面，就喺上半場補時5分鐘趁佢出場治理期間，賓諾克把握角球機會頭槌勁頂破網，賓福特半場領先1比0。

落後嘅曼聯終於瞓醒，下半場踢出激情，拉舒福特右路送高波入禁區，阿歷真度加拿祖門前「窩利」勁射破網，47分鐘追成1比1，62分鐘一次精彩配合，般奴費南迪斯送直線，海倫單刀埋門挑射建功，曼聯反超前2比1。

賓福特嘅弱點係冇後勁，今場都唔例外，被反超後愈踢愈沉，最終曼聯保住2比1勝局完場。