美職常規賽煞科　美斯極速「戴帽」贈興

美職常規賽周日(20日)早上煞科，提早獲得冠軍嘅國際邁亞密並冇留力季後賽，主場以6比2大勝新英倫革命，球王美斯後備上陣，極速於11分鐘內上演「帽子戲法」射入3球，實在非常誇張。

今場對於「一哥」國際邁亞密而言，只係例行公事，正選陣容收起美斯，呢支富豪球隊比賽初段亦漫不經心，開波2分鐘就失守，踢到34分鐘落後2球。不過，國際邁亞密球星們一發力，立即扭轉局勢，蘇亞雷斯上半場後段梅開二度扳平2比2。

換邊後，基馬斯治建功協助國際邁亞密反超前，之後成為美斯表演時間，呢位37歲老將57分鐘後備上陣，分別於78、81及89分鐘入波，換言之11分鐘內完成「帽子戲法」，佢上周三(16日)世界盃外圍賽為阿根廷出戰玻利維亞，亦射入3球，短短5日內第2次「戴帽」，果然寶刀未老。

美斯今季美職上陣19場射入20球及10次助攻，效率極之高，值得一提，國際邁亞密獲得明年由美國舉行嘅世冠盃參賽資格，意味美斯屆時有機會同歐洲各大豪門交鋒。