韋碧克成悲情英雄　做贏波功臣最後被抬離場

周六(19日)英超賽事，白禮頓作客1比0擊敗紐卡素，老將韋碧克一箭定江山係贏波英雄。不過「韋大帝」比賽尾聲發生意外，同對手相撞後懷疑嚴重受傷，要吸住氧氣用擔架抬離球場，傳聞腰部位置受到重創。

白禮頓今季成績突出，老將前鋒韋碧克嘅勇態係關鍵原因，呢位前鋒喺35分鐘同佐真尼奧魯達撞牆後射入，拎到今季第5個聯賽入波，白禮頓就憑呢球贏紐卡素1比0，依家只係落後前4位置2分。

不過，韋碧克喺比賽尾聲同紐卡素中堅法比安舒哈相撞，據報腰部被對方膝頭撞中，軍醫即場為佢治理數分鐘後，韋碧克就吸住氧氣瞓擔架離場。如果腰部出現骨折等情況，勢必要長時間休養。

白禮頓領隊靴斯拿賽後表示：「韋碧克未做檢查之前，我答唔到任何問題，佢背脊被對手膝頭撞中，希望情況唔好太差，但我唔肯定。韋碧克唔止係好球員，仲係隊友嘅好榜樣。」