拉素中堅「狂送禮」　祖記有運贏波創紀錄

周日(20日)凌晨意甲，祖雲達斯冇人入波，卻仍然以1比0擊敗拉素，因為對手2位中堅連番「送禮」，先係阿利斯奧羅馬洛尼上半場食紅牌被逐，比賽末段輪到馬里奧基拉擺烏龍，祖記有運贏波，並創下球隊史上首次開季前8場聯賽僅失1球嘅超強防守紀錄。

祖雲達斯今場創造唔少射門，單計前鋒杜辛華荷域已經有7次起腳，但只有1次中目標。拉素處於捱打之餘，防線更加頻頻犯錯，上半場24分鐘，阿利斯奧羅馬洛尼剷跌單刀嘅皮爾卡魯魯，被球證直接出示紅牌趕出場。

祖雲達斯踢多1人，攻勢一浪接一浪，但往往失之交臂，直至85分鐘，祖安卡巴爾左路傳中，馬里奧基拉想解圍反而擺烏龍，祖記就憑呢個幸運入球全取3分，追至同榜首拿玻里同分，但踢多1場。

另1場意甲，AC米蘭上半場29分鐘就有中場雷恩達斯被逐，但仍然憑卓禾斯早段入波，主場以1比0擊敗烏甸尼斯。