離奇畫面！韋比被質疑「遙控」球證執法

阿仙奴喺周日(20日)英超，作客0比2不敵般尼茅夫，關鍵一幕係上半場30分鐘，阿仙奴中堅威廉沙列巴被逐離場。喺紅牌出現前，鏡頭影到英國職業裁判員公司(PGMOL)主席韋比喺看台上，聽住耳機兼拎出手機打字，被質疑係「遙控」球證做出判決。

沙列巴喺中場線附近拉跌伊雲尼遜，由於距離龍門較遠，兼有另一邊守將有機會包抄，球證羅拔鍾斯最初只係出示黃牌，但直播畫面就影到觀眾席上，韋比右手按住耳機，左手拎出電話打字，同一時間VAR就介入，要求羅拔鍾斯睇重播覆核，最終將黃牌升格為紅牌。

見到呢個離奇畫面，難免會引起球迷猜疑，《天空體育》主持加歷查就喺社交網留言：「韋比係咪參與咗沙列巴紅牌嘅決定？」由於《天空體育》同PGMOL有合作關係，加歷查好快就將有關留言刪除。

據多間英國傳媒報道，韋比當時確實有聽住VAR房同球證嘅即時對話，但強調該位PGMOL話事人，「冇能力」亦「冇權力」影響現場執法球證嘅判決，一切判罰都係現場球證自己嘅決定。