同時開波唔睇曼聯　費格遜轉撐鴨巴甸

曼聯傳奇領隊費格遜，上星期被「紅魔鬼」解除全球大使職務，事件被簡東拿、桑拿士等名宿形容為「羞辱」、「醜聞」。近年經常入場撐曼聯嘅費Sir，周六(19日)並冇去奧脫福睇曼聯主場反勝賓福特，而係轉去睇蘇超聯賽，為舊東家鴨巴甸打氣。

曼聯對賓福特嘅英超，同埋些路迪對鴨巴甸嘅蘇超，星期六同時間舉行，剛被「炒魷」嘅費Sir就放棄支持曼聯，選擇去睇蘇超榜首大戰。賽前些路迪同鴨巴甸都係7戰全勝，些路迪上半場憑旗手怜央同古橋亨梧入波領先兩粒，不過鴨巴甸就發揮費格遜「打不死」後勁，下半場連追2球，最終踢成2比2平手。

費格遜加盟曼聯前，喺1978年至1986年間曾執教鴨巴甸，為呢間蘇超球會拎到歐洲盃賽冠軍盃等8個錦標，鴨巴甸主場亦設有費格遜嘅銅像，對費Sir嘅尊敬程度唔輸比曼聯。不過據英國傳媒報道，費Sir今次行程其實係預先安排，並非對曼聯嘅「報復」。費Sir幾時再入奧脫福睇波？球迷拭目以待。