坦哈格又牙擦擦：我哋今季只有1場踢得差

曼聯上場英超幾經辛苦，以2比1反勝賓福特，總算打破連續5場比賽不勝困局，但整體表現仍然未如理想。不過，賽後領隊坦哈格卻認為紅魔鬼今季演出令人滿意，只有上月0比3不敵熱刺，先至屬於踢得差。

海倫射入反勝1球，坦哈格罕有表現激動，同身邊助教大肆慶祝，可見佢近期承受極大壓力，曼聯贏波後，呢位荷蘭名帥可以暫時保住份工，賽後接受訪問時牙擦擦話：「今季我哋只有1場踢得差，就係對熱刺，因為當時有球員領紅牌，踢少1人，其餘比賽表現出色，踢出風格及鬥志，今場只係1次勝利，我哋會繼續戰鬥，要贏晒未來每1場比賽。」

曼聯將於嚟緊周五(25日)凌晨歐霸盃作客由摩連奴執教嘅費倫巴治，兩位新舊紅魔鬼主帥交手，肯定有激鬥。