同一畫面兩種判決　施洛贏波照插球證

利物浦周日(20日)英超2比1擊敗車路士，雖然贏波繼續做榜首，不過領隊施洛對球證同VAR嘅執法仍非常火滾。車路士中堅艾達拉比奧約早段拉跌單刀嘅迪亞高祖達，犯規情況同之前1日阿仙奴中堅威廉沙列巴被逐一模一樣，但今場球證只係判黃牌。

艾達拉比奧約喺中場線拉跌單刀嘅迪亞高祖達一幕，發生喺開波第6分鐘，考慮到前一日威廉沙列巴喺相同位置作出相同犯規被逐，大部份球迷都覺得艾達拉比奧約要「提早沖涼」，但球證最終只出示黃牌。利物浦領隊施洛表示：「我尋日先睇完相似嘅情況，個後衞被趕出場，呢啲判決非常關鍵，往往會影響一場波嘅勝負。」

利物浦本來仲有另一個12碼，但同樣被VAR否決，施洛不滿表示：「因為我哋贏波，呢啲(誤判)已經唔重要，但我覺得呢啲判決好關鍵，我唔明VAR點解要介入。晏菲路嘅球迷今場非常投入，可能係因為見到球證呢啲判決，佢哋同我一樣咁『盲目』。」