格連活特破入球荒　同杜曹會面增籌碼

周一(21日)凌晨法甲，馬賽作客5比0大破蒙彼利埃，依家只係落後榜首巴黎聖日耳門(PSG)3分。馬賽前鋒格連活特今場打破入球荒，攻入個人法甲第6球，據報佢將同英格蘭新領隊杜曹會面，及時重拾射門鞋可以增強佢「談判」籌碼。

格連活特今季轉投馬賽後，表現大爆發，雖然之前經歷4場入球荒，但佢今場用假腳呃過守將，再高速突破防線射入，協助馬賽大勝5比0。英國《太陽報》指格連活特未放棄重返英格蘭國家隊希望，將會同新領隊杜曹見面，睇下有冇機會獲重召，否則會轉代表牙買加國家隊，佢今季8場聯賽入6球成績，就係最好嘅籌碼。

格連活特喺射手榜以6球排第2位，僅次於PSG嘅巴特利巴高拿，下輪馬賽就會主場迎戰PSG，馬賽教練迪薩比賽後表示：「格連活特愈嚟愈成熟，馬賽可以踢得更好。PSG係法國最強球隊，但我哋一樣會以3分為目標。」