歐聯神兵加盟業餘隊　屈機首演34分鐘入5球

曾效力羅馬、拿玻里，踢過歐聯同世界盃嘅希臘名將文奴拿斯，雖然依家仍係33歲「當打之齡」，但今季離開意甲沙蘭力坦拿後，上星期竟然簽約希臘第4級業餘球會，周日(20日)佢為新球會首演，只係踢34分鐘就入5球，認真誇張！

司職中堅嘅文奴拿斯，曾經係曼聯、車路士等豪門收購目標，佢今夏為家人生活考慮，上星期決定重返細個出道嘅家鄉球會Pannaxiakos，呢間業餘球會踢緊希臘第4級聯賽，獲文奴拿斯加盟即刻「升呢」，成為超班球隊。

文奴拿斯周日首演對Marpissaikos，正選上陣上半場即狂入5球，唔知係咪驚太過「屈機」，教練踢到34分鐘已經提早將文奴拿斯換走，最終Pannaxiakos大勝12比1。