接棒費Sir！加利仔做曼聯「宣傳大使」

曼聯上星期革除傳奇領隊費格遜「宣傳大使」職務，引起球壇極大回響，不過據英國傳媒報道，曼聯名將加利尼維利將會以兼職身份接任「宣傳大使」，近日更已飛去印度進行佢嘅宣傳任務。

英國《太陽報》報道，加利仔會以兼職身份，從事曼聯宣傳大使工作，佢近日就飛去印度莫哈利出席足球學校活動。消息指曼聯解除費Sir從事11年嘅「宣傳大使」職務後，每年可以慳超過200萬鎊。

事實上，為曼聯拎過8次英超冠軍嘅加利仔，一直係新老闆拉特克利夫心腹，早前成立嘅興建新球場工作小組，加利仔亦獲邀加入，直接參與曼聯興建「新奧脫福球場」嘅決策。