坦哈格難得謙虛：摩連奴係教練榜樣

聯賽擊敗賓福特後，曼聯下場歐霸盃將會對前主帥摩連奴領軍嘅費倫巴治，亦係坦哈格另一個大難關。坦哈格出席足球作家協會北方經理人頒獎晚宴期間，被問下場同「寸王」正面交鋒，永遠把口唔輸嘅坦帥難得謙虛，佢話：「佢係好多教練嘅榜樣。」

坦哈格表示同摩連奴交手係一場大戰：「我好享受同佢交手，佢教親都係強隊，佢係個贏家，已經捧過好多獎盃，佢係好多教練嘅榜樣。」

有分析指，雖然曼聯高層早前開會決定繼續畀機會坦哈格，但重點係要提升表現同成績，其中對費倫巴治係一大關口，一來為面子，坦哈格如果輸畀曼聯前主帥自己都醜，二來曼聯喺歐霸盃兩戰兩和仲未開齋，有贏波壓力。

坦哈格仲話，今季目標係繼續捧盃：「上兩季獎盃係過去嘅事，足球係睇眼前，要每日、每季證明自己，今季只係剛開始，目標係再捧盃。」