沙拿要求續約3年　等待利物浦答覆

穆罕默德沙拿對利物浦嘅重要毋須多講，明年夏天合約到期嘅佢，據報希望同利物浦續約3年，到約滿時沙拿將滿35歲，而對於利物浦嚟講無疑係一場豪賭。

雖然沙特聯賽一直希望簽入沙拿，搵佢做阿拉伯地區足球生招牌，但沙拿仍然以利物浦為重，早前「雙紅會」擊敗曼聯後，更放言自己可能最後一次在奧脫福比賽，因為會方仍未同佢傾續約。

利物浦目前排英超榜首，同沙拿火熱狀態有直接關係，今季沙拿交出7球6助攻，包括上場2比1擊敗車路士嘅致勝球，都係出自沙拿助攻所入。

不過沙拿已經32歲，周薪高達35萬鎊，同佢續約3年風險都唔細，沙拿狀態仲可以維持幾耐，將會非常關鍵。