甸恩軒達臣送大禮　水晶宮0比1不敵森林

周二(22日)凌晨英超獨腳戲，諾定咸森林主場1比0擊敗水晶宮，今場雙方都有唔少埋門，水晶宮門將甸恩軒達臣喺國家隊臨時主帥卡斯利觀戰下「送禮」，慘成輸波罪人。

上半場兩隊鬥攻，水晶宮前鋒尼基迪亞曾遠射中楣角彈出，森林亦有基斯活特頭槌頂中柱，直到65分鐘出現入波，基斯活特禁區外起腳食唔應，甸恩軒達臣本來可以輕易撲到，點知佢竟然甩手畀個波近柱漏入。水晶宮尾段全力反撲但無功而還，森林最終小勝1比0。

27歲嘅甸恩軒達臣上星期為英格蘭喺歐國聯上陣，相隔近4年後再為國家隊上陣，點知返到聯賽就喺卡斯利面前出醜，佢可唔可以獲得明年1月上任嘅新帥杜曹賞識係未知數。水晶宮領隊格拉斯拿賽後表示：「軒達臣想道歉，但我唔批准，因為我哋唔想責怪任何人，佢上季同今季有好多精彩撲救拯救球隊，所以佢唔需要為任何犯錯道歉。」