亞冠盃2　爭氣！理文主場硬撼曼谷聯

理文周四（24日）坐鎮旺角大球場出戰「亞冠盃2」G組分組賽，主場迎戰來自泰國的曼谷聯。上月兩仗對陣南定FC及淡濱尼流浪的「黃黑軍團」，目前在「亞冠盃2」仍未有分落袋，預期今仗會積極進取，力求一洗頹風！（港台電視32周四晚上6時直播）

曼谷聯於分組賽暫時錄得1勝1和，理文暫代主教練朱兆基認為對手實力不容忽視，今仗期望利用主場優勢，踢出東道主的氣魄：「對手實力方面有幾強就唔使多講，但畢竟我哋有主場之利，對手要喺我哋身上攞分都唔容易，作為一支香港球隊，我哋絕對想喺主場踢出拚勁同風格。」他表示今場會以穩守為主，避免於開局早段失球，再伺機製造反擊。另外，早前黃威、杜度等將已傷愈，今場分組賽有望可重返大軍名單。

中場保利臣指一周三賽之下，體力恢復方面的確頗具挑戰，但教練團隊已做足準備應對：「啱啱星期日先踢完聯賽，緊接對陣曼谷聯同出戰銀牌，體力消耗係非常大，不過我哋最近狀態都唔錯，之前開會睇咗曼谷聯幾場嘅比賽影片，對佢哋嘅踢法有啲了解，佢哋新季外援主力都好踢得，我好期待可以同佢哋交手。今場喺旺角場比賽，加上六點開波，天氣相對涼爽，對我哋嘅發揮嚟講更加有利。我哋好想喺主場攞到分，會盡力踢場好波畀球迷睇！」球隊於「亞冠盃2」分組賽遭遇兩場失利，保利臣期望於比賽中發揮出球隊實力和凝聚力，展現出理文征戰亞洲賽的鬥志。

周四（23日）分組賽安排於傍晚6時開賽，被問及會否擔心影響入場人數，代表球隊出席賽前記招的胡晉銘表示，球迷的支持對球隊而言相當重要，盼以表現打動香港球迷入場觀賽：「聽晚6點鐘開波，明白球迷可能未必趕得切收工嚟旺角，就算聽日抽唔到時間入場，我都希望之後嘅比賽，球迷都可以繼續支持，因為球迷對於球員嚟講非常重要，我哋會盡力踢場好波，令大家開心番。」理文近期受傷患困擾，記招上「晉銘」透露後衞馬天尼斯因傷缺陣，助教司徒文俊表示球隊已作適當部署，相信可以應付：「傷兵方面可能會有少少隱憂，但我哋賽前攞咗對手唔同比賽片段，分析對方進攻防守策略等等，希望有更多資訊畀球員去認識對手踢法，無論如何跟住落嚟每一場比賽、每一分鐘，我哋都會落力爭取最好成績。」

曼谷聯是有36年歷史的泰國勁旅， 於20223至24年球季T1聯賽位列亞席，上季曾於亞冠盃分組賽中與傑志抽入同一小組，當時作客的曼谷聯以2比1擊敗「藍鳥」，最後成功出線16強。陣中擁有今季聯賽上陣9場攻入4球、「亞冠盃2」攻入兩球的外援加薩尼（Muhsen Al-Ghassani），以及今季聯賽已貢獻4入球、3助攻的28歲荷蘭藉前鋒施夫高域（Richairo Zivkovic），實力強橫。

而曼谷聯主教練斯里潘（Tawan Sripan）在賽前記招強調，球隊有豐富與香港球隊對陣的經驗，對「黃黑軍團」的實力有所了解，今場會以全取3分為目標：「我哋有唔少球員有同香港球隊對賽嘅經驗，球隊上季又曾經同傑志交手，知道香港球隊嘅實力水平唔係講笑。我對球員喺控制比賽局勢方面充滿信心，希望聽晚場波可以順利攞走3分。」

【理文預計正選陣容】

門將：28.陳嘉豪

後衞：2.周子謙 19.金旻奎 13.李毅凱 4.立花稜也

中場：7.保利臣 6.胡晉銘 20.保連奴

前鋒：8.艾華頓 9.安尼亞 91.羅沙