咁大整蠱？皇馬新星「被官宣」加盟祖記

轉會市場經常出現唔少傳聞，意甲勁旅祖雲達斯官方社交網早前突然公布，歡迎皇馬中場新星艾達古拿加盟，事後證實有「黑客」入侵祖記社交網帳戶，發放假消息，令祖記球迷空歡喜一場。

「假貼文」言之鑿鑿話：「歡迎來到祖雲達斯，艾達古拿，呢位正在冒起嘅新星成為祖雲達斯一員，準備一齊創造歷史。」貼文配上艾達古拿行出機場相片，幾乎可以假亂真。

事後祖雲達斯官方及「轉會權威」記者羅曼諾(Fabrizio Romano)都作出澄清係假消息，據悉之所以有人整呢單「轉會新聞」，好可能由於祖記陣中亦有1位土耳其新星基倫耶迪斯，佢同艾達古拿都係19歲，屬於土耳其國家隊隊友，加上曾傳出艾達古拿想離開皇馬，爭取更多上陣機會，因而有人幫手「促成交易」，希望艾達古拿可以同基倫耶迪斯喺祖雲達斯並肩作戰。