天價球星變水貨　安素淪為「009」

車路士上年2023年1月豪花1.2億歐元(約10億港元)向賓菲加收購中場安素費南迪斯，呢位23歲阿根廷國腳上季上陣40場入7球，表現尚可，但今季水準嚴重走下坡，上陣9場0入球0助攻，被網民嘲諷淪為「009」。

安素費南迪斯年紀輕輕已經協助阿根廷奪得2022年世界盃及今屆美洲國家盃冠軍，同時被視為車路士首席中場，但今季狀態低迷，英國傳媒批評佢每次上陣，都踢唔出應有身價，進攻毫無貢獻之餘，防守亦錯漏百出。

值得一提，前車路士主帥普捷天奴上季已經考慮棄用安素費南迪斯，最諷刺係佢季尾養傷期間，車仔成績反而更好，難怪網民紛紛認為，如果領隊馬利斯卡想保住帥位，就應該「犧牲」安素費南迪斯。