【官宣】哥頓同紐卡素續約　利物浦死心吧

紐卡素正式宣布同翼鋒安東尼哥頓續約，雖然冇透露實際年期，但根據「轉會權威」記者羅曼諾(Fabrizio Romano)早前爆料，新合約長達6年，直至2030年夏天，粉碎利物浦簽入呢位23歲英格蘭國腳嘅美夢。

近期多次傳出利物浦計劃收購安東尼哥頓，接替可能明夏離隊嘅穆罕默德沙拿，但係哥頓傾向留隊，加上紐卡素有沙特阿拉伯財團撐腰，唔等錢使之餘，仲可以開出「肥約」留住呢位新星，雙方順理成章續約。

安東尼哥頓2023年1月以4,000萬鎊(約4億港元)轉會費，由愛華頓加盟紐卡素，雖然首季表現欠佳，但上季狀態回勇，踢48場入12球，至今為「喜鵲」74次披甲，有15球及進帳及11次助攻。