巴塞4比1炒拜仁　拉芬夏「戴帽」威盡

歐聯重量級對決竟變屠殺戰！巴塞隆拿周四(24日)凌晨主場迎戰拜仁慕尼黑，憑第100次上陣嘅拉芬夏比洛尼連中三元，輕鬆以4比1取勝，打破近6次對住拜仁全部輸波嘅宿命。

之前6次喺歐聯對拜仁輸晒，包括4年前輸2比8嘅慘劇，當年拜仁嘅教練，就係依家巴塞主帥費歷克。今場開波54秒，巴塞就有拉芬夏閃電打開紀錄，拜仁18分鐘靠哈利卡尼追平，不過佢哋後防連番出錯，巴塞由羅拔利雲度夫斯基建功，以及拉芬夏再入多2粒，以4比1大勝而回。

今場係拉芬夏第100次為巴塞上陣，喺呢場里程碑之戰連中三元後，佢100場比賽錄得29個入波同33次助攻，亦係繼「2R」李華度、朗拿甸奴同埋尼馬後，第4個為巴塞喺歐聯「戴帽」球員。拉芬夏賽後表示：「對球迷嚟講，呢場係完美復仇(2比8慘敗)，但作為球員我哋只係集中下一場比賽，第100場比賽入3球梗係開心，但球隊有表現同贏波係更加重要。」