利物浦破紀錄作客6連勝　超強氣勢撼阿仙奴

周四(24日)凌晨歐聯，利物浦作客1比0擊敗RB萊比錫，今屆歐聯3戰全勝。荷蘭領隊施洛繼續改寫歷史，佢成為英格蘭頂級聯賽史上前12輪最佳成績教頭，開季作客6連勝亦係利物浦史上首次，周一(28日)凌晨作客阿仙奴信心爆棚！

利物浦今場贏得唔輕鬆，27分鐘達雲紐尼斯接應穆罕默德沙拿頭槌二傳射入，不過RB萊比錫亦有唔少具威脅攻門，好在門將基利靴屢救險球，最終「紅軍」以1比0小勝。自施洛夏天接替高普執教後，利物浦今季各項賽事12戰有11勝，係英格蘭頂級聯賽史上新帥同期(頭12場)最佳紀錄。

利物浦開季作客6連勝，同樣係球會132年歷史首次出現，嚟緊作客阿仙奴會力爭7連勝，施洛賽後表示：「利物浦有過好多偉大時代、有無數偉大球員，要喺利物浦創紀錄幾乎冇可能，所以球員應該覺得光榮。創紀錄當然好，但有啲嘢比紀錄更加珍貴，就係冠軍獎盃。」