會長證實　利物浦阿仙奴斟土耳其國腳

土耳其球壇近年新星輩出，效力加拉塔沙雷嘅翼鋒巴列斯耶馬斯，已成歐洲多間豪門爭奪目標，佢嘅前球會會長近日證實，阿仙奴同利物浦都已經準備提出斟介，預計轉會費約2,500萬鎊。

司職翼鋒嘅巴列斯耶馬斯，喺國家隊同球會都有出色表現，佢前度球會安卡拉據報持有佢20%擁有權，任何轉會都有權「分帳」，安卡拉會長薛達證實：「我聽到阿仙奴同利物浦都想提出收購，而紐尼沙軒(多蒙特教練)亦想將佢帶去德甲。加拉塔沙雷未聯絡我哋，以我所知轉會費係2,500萬鎊左右。」

巴列斯耶馬斯多才多藝，除咗可以勝任兩邊翼鋒同前鋒外，甚至可以客串右閘，德國傳媒指RB萊比錫同法蘭克福亦有意加入戰團，呢位24歲球星好大機會喺冬季轉會窗離隊。