咩話？沙拿落選非洲足球先生10強名單

非洲足協公布2024年非洲足球先生候選人最後10強名單，結果令人大感意外，因為利物浦射手穆罕默德沙拿、上屆得主域陀奧森漢等多位球星都榜上無名，協助阿特蘭大奪得上屆歐霸盃冠軍嘅尼日利亞國腳盧卡文成為大熱人選。

最後10強名單之中，唔只冇穆罕默德沙拿、域陀奧森漢，即使車路士前鋒尼高拉斯積遜、皇馬中場巴謙戴亞斯都落選。取而代之係一班後起之秀，包括多蒙特前鋒古拉斯、阿特蘭大前鋒盧卡文、雷恩翼鋒高爾尼、利華古遜後衞塔蘇巴等。

上屆三甲只有巴黎聖日耳門右閘阿舒拉夫仍然有入選，上屆得主域陀奧森漢、第3位穆罕默德沙拿都被踢出局。

非洲足協以球員今年1月至10月表現作出評選，曾經2次獲得非洲足球先生嘅穆罕默德沙拿今年演出仍然保持高水平，但卻連最後10強都榜上無名，實在令人費解。至於最後由邊位球員獲得今年非洲足球先生殊榮，將於12月公布。