耶馬穩奪U21金球獎　阿古路：勁過雲尼斯奧斯

金球獎頒獎禮下周舉行，皇家馬德里嘅雲尼斯奧斯祖利亞被視為得獎大熱，據西班牙《Relevo》報道，巴塞隆拿新星拉明耶馬，亦鐵定會贏得U21金球獎(KOPA獎)，呢位17歲新星喺「國家打吡」對皇家馬德里後，將會飛去巴黎出席頒獎禮。

17歲嘅耶馬已經係巴塞隆拿同西班牙國家隊主力，前巴塞射手阿古路喺「國家打吡」前受訪，表示耶馬更勝雲尼斯奧斯：「耶馬嘅天賦，有好多地方都好過雲尼斯奧斯，雖然雲尼斯奧斯更有經驗，亦係世界3大球員之一，但如果我係教練，我會更傾向於耶馬。」

KOPA獎喺2018年開始頒發後，5個得獎者有4個都可能喺嚟緊「國家打吡」亮相，包括基利安麥巴比(2018年)、柏迪(2021年)、加維(2022年)同祖迪比寧咸(2023年)。