麥巴比追討欠薪勝訴　PSG要磅水

基利安麥巴比同舊主巴黎聖日耳門嘅欠薪糾紛，周五(25日)有判決，法國職業足球聯盟判麥巴比勝訴，勒令PSG支付5,500萬歐元(約4.6億港元)欠薪。

據報PSG今次案件嘅欠薪，包括本應在今年2月發放嘅3,600萬歐元獎金，4、5、6月工資及道德獎金，總計5,500萬歐元。

法甲聯賽法律委員會要求PSG在8日內付清上述欠款，PSG已提出上訴。今次案件源於去年8月雙方一份協議，麥巴比拒絕啟動合約中自動延長一年條款，當時PSG下令將麥巴比雪藏，停止操練，不過後來傾掂數，麥巴比重返一隊，據稱當時麥巴比答應離隊後球隊會收到一筆「離隊費」。

不過事實是，「麥總」今夏自由身轉投皇馬，PSG斗零都冇收過，認為麥巴比違反協議，因此扣起人工同獎金引發今次訴訟，至於麥巴比反口有冇手尾，就係另一回事。