老竇爆料　賓菲加中場會去利物浦

賓菲加中場10號仔奧簡高古老竇爆料，自己個仔可能會去利物浦。原因係奧簡高古加盟賓菲加之前效力飛燕諾，係施洛旗下主力，雙方有機會再合作。

奧簡高古老竇指出：「我個仔(奧簡高古)喺賓菲加表現出色，而且球員同教練都唔會只效力一支球隊，依家嘅足球，球隊要考慮財政同盈利，奧簡高古可以為球隊帶來利潤，呢啲都係球迷共識。」

至於利物浦係咪睇中奧簡高古，佢老竇就話：「我哋同施洛係朋友，佢同奧簡高古經歷過好多事，點解唔可以？呢件事有可能發生。」

23歲嘅奧簡高古在飛燕諾青訓出身，然後上一隊，曾與施洛共事兩個球季，2023年夏天轉投賓菲加，轉會費總計3,000萬歐元，佢亦係土耳其現役國腳，上陣36場入2球。睇履歷，呢位土耳其中場有一定條件同能力踢利物浦。