C朗缺陣　艾納斯7連勝斷纜玩殘賭仔

周五(25日)深夜沙特阿拉伯職業聯賽爆出冷門，艾納斯巨星C朗休息缺陣，球隊立即失去方寸，戰至補時獲得12碼，作客驚險逼和艾科魯特3比3，連1.19倍客勝都開唔出，艾納斯各項賽事7連勝走勢告終。

艾納斯剛於周中踢完亞冠精英盃，加上今場聯賽對手只係護級份子艾科魯特，教練皮奧利安排39歲嘅C朗休息，點知出事，開賽12分鐘就失守。雖然艾納斯憑拿樸迪、塔利斯卡各入1球反超前，但防線不穩，再被艾科魯特兩度攻破大門。

踢到補時，有艾科魯特球員喺禁區內犯手球，球證睇完VAR後判罰12碼，塔利斯卡主射入網逼和3比3，艾納斯執到1分都算好彩，現時落後榜首希拉爾3分，兼踢多1場。

值得一提，包括國際賽在內，艾納斯中堅拿樸迪近4次上陣都入波，難怪皇馬都有意簽入呢位30歲西班牙國腳。