阿諾特同意續約　等做紅軍隊長

利物浦右後衞阿歷山大阿諾特將於明夏約滿，雖然盛傳皇馬計劃簽入呢位26歲英格蘭國腳，但英國傳媒最新消息指阿諾特同意續約，除咗獲得35萬鎊(約350萬港元)周薪之外，會方承諾將來華基爾雲迪積克離隊後，委任阿諾特做隊長，令佢死心塌地為紅軍效力。

利物浦面對皇馬挖角，使出渾身解數留住阿歷山大阿諾特，避免明夏人財兩失，會方「名與利」雙管齊下，遊說阿諾特續約，包括開出35萬鎊周薪，令佢同穆罕默德沙拿睇齊，成為隊內最高薪球員之一，並「欽點」佢為下任隊長。

事實上，阿歷山大阿諾特現時已經係紅軍副隊長，加上隊長華基爾雲迪積克將於明夏約滿，一旦呢位荷蘭國腳離隊，阿諾特就會順理成章接過隊長臂章。

歷任利物浦隊長喺球壇上擁有崇高地位，包括魯殊、謝拉特等名宿，紅軍隊長臂章對於阿諾特有極大吸引力，點都好過去皇馬做「綠葉球員」。