每月最佳變長坐冷板　迪亞路或脫「魔」

曼聯上場歐霸盃打和費倫巴治1比1，翼鋒阿密特迪亞路89分鐘入替受傷嘅安東尼馬菲奧斯，當時呢位22歲科特迪瓦國腳一臉不悅，似乎唔多想上陣，需要助教雲尼斯達萊從旁鼓勵開解。英國《太陽報》指阿密特迪亞路不滿長坐冷板，打算拒絕續約，明夏離隊。

阿密特迪亞路2021年1月由阿特蘭特大加盟曼聯以來，上陣機會唔多，曾經被外借去格拉斯哥流浪、新特蘭，今季原本有開始，季初表現大勇，當選曼聯8月最佳球員，但之後被領隊坦哈格投閒置散，過去2場英超更加冇上陣過。

曼聯上場對費倫巴治，賽前傳出阿密特迪亞路可望擔任正選，但結果都係做後備，如非後備上陣嘅安東尼馬菲奧斯意外傷出，恐怕佢又會全場做觀眾，難怪佢當時入替時黑晒面。

阿密特迪亞路將於明夏約滿，雖然會方有1年優先續約權，但雙方近期續約談判並唔順利，迪亞路唔想再浪費球員生涯，可能選擇明夏走人。